Ballina Kuadri mësimor Manifestimet Materiale pedagogjike Nx. e diplomuar 25/26 Informacione

Donacionet & Anëtarsimi

RRUGA E DIJES NGA ABETARJA DERI TE DIPLOMA - NJË RRUGËTIM I KURORËZUAR ME SUKSES

Më 4 korrik 2026, në lokalet e RINORA 4, u mbajt ceremonia solemne e ndarjes së diplomave për nxënësit e mësimit plotësues të gjuhës shqipe LAPSH »Naim Frashëri» në Kantonin e Cyrihut, të cilët përfunduan me sukses ciklin e mësimit plotësues në gjuhën shqipe.

Ceremonia u zhvillua në një atmosferë festive dhe dinjitoze. Programi filloi me hyrjen e nxënësve së bashku me mësimdhënësit e tyre të shoqëruar nën tingujt e muzikës shqipe, duke krijuar vërtet një atmosferë emocionuese për të gjithë të pranishmit.

Kryetari i LAPSH për Kantonin Cyrih, z. Naser Ulaj, i përgëzoi nxënësit për suksesin e arritur dhe shprehu mirënjohjen e tij për përkushtimin dhe punën e palodhur të mësimdhënësve në ruajtjen dhe kultivimin e gjuhës, kulturës dhe identitetit kombëtar te brezat e rinj.

Me një fjalë përshëndetëse ceremoninë e nderoi edhe zavendësambasadorja e Republikës së Kosovës në Bernë, znj. Shukrije Ramadani, e cila uroi nxënësit për këtë arritje të rëndësishme dhe u dëshiroi atyre suksese të vazhdueshme në rrugëtimin e tyre arsimor.

Më pas, të pranishmëve iu drejtua edhe Konsulli i Përgjithshëm i Republikës së Kosovës në Cyrih, z. Vigan Berisha, i cili vlerësoi punën e LAPSH Cyrih dhe përgëzoi nxënësit për përkushtimin e treguar ndër vite dhe i inkurajoi ata që ta vazhdojnë shkollimin me të njëjtin vullnet, duke ruajtur gjithmonë lidhjen me gjuhën dhe kulturën shqiptare.

Pjesa qendrore e ceremonisë ishte ndarja e diplomave. Mes duartrokitjeve dhe emocioneve të prindërve, familjarëve dhe të ftuarve, 19 nxënësve ju ndanë diplomat nga kryetari i LAPSH Cyrih dhe mësimdhënësit e tyre.

Nxënësit që do të diplomohen këtë vit vijnë nga këto pika shkollore:

 Nga pikat shkollore të mësuesit Naser Ulaj - 5 nxënës.

 Nga pikat shkollore të mësueses ELfete Hasi - 5 nxënës.

 Nga pikat shkollore të mësueses Aferdita Veliu - 4 nxënës.

 Nga pikat shkollore të mësueses Sabahat Krasniqi - 4 nxënës.

 Nga pikat shkollore të mësueses Drilona Maloku - 1 nxënës.

Programi artistik që pasoi i dha ceremonisë një ngjyrim të veçantë. Dy nxënës interpretuan këngë shqipe (Pa duvak nuk bëhem nuse), ndërsa një tjetër recitoi një poezi (Gjuha shqipe). Një moment veçanërisht prekës ishte rrëfimi i një nxënëseje të po sa diplomuar, e cila ndau me të pranishmit përvojën dhe rrugëtimin e saj në shkollën e mësimit plotësues të gjuhës shqipe, nga klasa e parë deri në përfundimin e klasës së tetë, duke falënderuar mësimdhënësit dhe prindërit për mbështetjen e vazhdueshme.

Atmosfera gjatë gjithë ceremonisë ishte e mbushur me emocione, gëzim dhe krenari. Për të përjetësuar këtë ditë të veçantë, fotografi i njohur Lulzim Hasi realizoi fotografi kujtimi për secilin nxënës të po sa diplomuar, duke u dhuruar atyre një kujtim të çmuar nga kjo ngjarje e rëndësishme.

Kjo ceremoni ishte jo vetëm një festë e suksesit të nxënësve, por edhe një dëshmi e përkushtimit të LAPSH »Naim Frashëri» për Kantonin e Cyrihut, mësimdhënësve, prindërve dhe institucioneve të Republikës së Kosovës për ruajtjen dhe zhvillimin e gjuhës shqipe, kulturës dhe identitetit kombëtar te brezat e rinj në diasporë.

Fotot: Lulzim Hasi

Paralelet - Orari Shkrime

28 Nëntori  2025 28 Nëntorit 2024 28 Nëntori 2023 Festat e Marsit 2023 Festa e 30 vjetorit

Tekste mësimore Planifikimi i mësimit Parapërgatitja e mësimit

Nx. e diplomuar 24/25

Aktivitete Donatorët